gulshan mein phul khilte hi sad-chaak ho gae

gulshan meñ phuul khilte hī sad-chāk ho ga.e

rañgīn hādse the alamnāk ho ga.e

daur-e-subū-o-jām chalā mai-kade meñ jab

ham be-niyāz-e-gardish-e-aflāk ho ga.e

dekhā jo merā hāl-e-zabūñ shām-e-intizār

apne to apne ġhair bhī namnāk ho ga.e

saaqī ye terā faiz-e-karam hai ki mai-gusār

bebāk the hī aur bhī bebāk ho ga.e

bād-e-sabā ko zid hai ki kyuuñ ḳhaak bhī rahe

mar kar jo kū-e-yār meñ ham ḳhaak ho ga.e

ye inqilāb-e-vaqt kā e.ajāz dekhiye

ahl-e-junūñ bhī sāhab-e-idrāk ho ga.e

achchhā huā jo 'muslim'-e-dīvāna chal basā

qisse to dār-o-gīr ke ab paak ho ga.e

gulshan mein phul khilte hi sad-chaak ho gae

rangin hadse the alamnak ho gae

daur-e-subu-o-jam chala mai-kade mein jab

hum be-niyaz-e-gardish-e-aflak ho gae

dekha jo mera haal-e-zabun sham-e-intizar

apne to apne ghair bhi namnak ho gae

saqi ye tera faiz-e-karam hai ki mai-gusar

bebak the hi aur bhi bebak ho gae

baad-e-saba ko zid hai ki kyun KHak bhi rahe

mar kar jo ku-e-yar mein hum KHak ho gae

ye inqilab-e-waqt ka eajaz dekhiye

ahl-e-junun bhi sahab-e-idrak ho gae

achchha hua jo 'muslim'-e-diwana chal basa

qisse to dar-o-gir ke ab pak ho gae