gum-gashta jab har parchhai ban jati hai

gum-gashta jab har parchhā.ī ban jaatī hai

tab ye vahshat bhī māñ-jā.ī ban jaatī hai

dariyā jaan ke mujh tak pyāse aa jaate haiñ

vaj.h-e-ta’āruf ābla-pā.ī ban jaatī hai

surḳh labāda oḌhe shaam hai aks kisī kā

dhuup sunahrī ik añgḌā.ī ban jaatī hai

kuchh logoñ kī duurī andhā kar detī hai

kuchh kurtoñ se to bīnā.ī ban jaatī hai

mujh meñ thoḌī ghor siyāhī mil jaa.e to

hijr-shaboñ vaalī tanhā.ī ban jaatī hai

us ke naam pe maiñ laḌne to aa jaatā huuñ

baat yahī us kī rusvā.ī ban jaatī hai

shaam Dhale hī ġham rone ko aa jaate haiñ

sub.h talak to ghar meñ kaa.ī ban jaatī hai

koī ik apnā hotā hai jis ke dukh par

'sādiq' apnī pīr-parā.ī ban jaatī hai

gum-gashta jab har parchhai ban jati hai

tab ye wahshat bhi man-jai ban jati hai

dariya jaan ke mujh tak pyase aa jate hain

wajh-e-ta’aruf aabla-pai ban jati hai

surKH labaada oDhe sham hai aks kisi ka

dhup sunahri ek angDai ban jati hai

kuchh logon ki duri andha kar deti hai

kuchh kurton se to binai ban jati hai

mujh mein thoDi ghor siyahi mil jae to

hijr-shabon wali tanhai ban jati hai

us ke nam pe main laDne to aa jata hun

baat yahi us ki ruswai ban jati hai

sham Dhale hi gham rone ko aa jate hain

subh talak to ghar mein kai ban jati hai

koi ek apna hota hai jis ke dukh par

'sadiq' apni pir-parai ban jati hai