gum-gashta manzilon ka mujhe phir nishan de

gum-gashta manziloñ kā mujhe phir nishān de

merī zamīn mujh ko mirā āsmān de

zaḳhmoñ kī aabrū ko na yuuñ ḳhaak meñ milā

chādar mire lahū kī mire sar pe taan de

ye dhaḌkanoñ kā shor qayāmat se kam nahīñ

ai rabb-e-saut mujh ko dil-e-be-zabān de

yā mujh se chhīn le ye mazāq-e-buland-o-past

yā mere bāl-o-par ko khulā āsmān de

māñgā thā maiñ ne kab ye jhukī gardanoñ kā ġham

razzāq-e-ġham mujhe ġham-e-gardūñ-nishān de

sail-e-sukūt ab to rag-e-jāñ tak aa gayā

izn-e-bayān de mujhe izn-e-bayān de

dāman kushāda phir se hai ḳhātūn-e-ġham 'rashīd'

taaza lahū se likh ke na.ī dāstān de

gum-gashta manzilon ka mujhe phir nishan de

meri zamin mujh ko mera aasman de

zaKHmon ki aabru ko na yun KHak mein mila

chadar mere lahu ki mere sar pe tan de

ye dhaDkanon ka shor qayamat se kam nahin

ai rabb-e-saut mujh ko dil-e-be-zaban de

ya mujh se chhin le ye mazaq-e-buland-o-past

ya mere baal-o-par ko khula aasman de

manga tha main ne kab ye jhuki gardanon ka gham

razzaq-e-gham mujhe gham-e-gardun-nishan de

sail-e-sukut ab to rag-e-jaan tak aa gaya

izn-e-bayan de mujhe izn-e-bayan de

daman kushada phir se hai KHatun-e-gham 'rashid'

taza lahu se likh ke nai dastan de