guman ke raKHsh-e-subuk ki ayal thame hue

gumāñ ke raḳhsh-e-subuk kī ayaal thāme hue

bhaTak rahā huuñ junūñ meñ ḳhayāl thāme hue

baqā kī jañg meñ ḳhud se falak se duniyā se

maiñ laḌ rahā huuñ tamannā kī Dhaal thāme hue

vo kashmakash bhī shanāsā.iyoñ kī kyā hogī

mileñge ḳhud se jab apne sifāl thāme hue

har ek pal koī bār-e-garāñ sā lagtā hai

ki jaise lamha guzārtā huuñ saal thāme hue

sarosh-e-ġhaib ke ma.abad ke sāmne masjūd

sabhī javāb haiñ gum-sum savāl thāme hue

maiñ zer-e-mauj-e-balā sirf itnā dekh sakā

za.iif haath purānā sā jaal thāme hue

zamīn-e-chashm kī andhī amiiq tah meñ kahīñ

ġhusīl ḳhvāb haiñ 'āsim' kudāl thāme hue

guman ke raKHsh-e-subuk ki ayal thame hue

bhaTak raha hun junun mein KHayal thame hue

baqa ki jang mein KHud se falak se duniya se

main laD raha hun tamanna ki Dhaal thame hue

wo kashmakash bhi shanasaiyon ki kya hogi

milenge KHud se jab apne sifal thame hue

har ek pal koi bar-e-garan sa lagta hai

ki jaise lamha guzarta hun sal thame hue

sarosh-e-ghaib ke mabad ke samne masjud

sabhi jawab hain gum-sum sawal thame hue

main zer-e-mauj-e-bala sirf itna dekh saka

zaif hath purana sa jal thame hue

zamin-e-chashm ki andhi amiq tah mein kahin

ghusil KHwab hain 'asim' kudal thame hue