ghumbad-e-zat mein ab koi sada dun to chalun

ġhumbad-e-zāt meñ ab koī sadā duuñ to chalūñ

apne so.e hue sāthī ko jagā luuñ to chalūñ

phir bikhar jā.ūñgā maiñ raah meñ zarroñ kī tarah

koī paimān-e-vafā ḳhud se maiñ bāñdhūñ to chalūñ

jaane tū kaun hai kis samt bulātā hai mujhe

terī āvāz kī parchhā.īñ ko chhū luuñ to chalūñ

bujh na jaa.eñ tire jalvoñ ke muqaddas fānūs

apne bhīge hue dāman ko nichoḌūñ to chalūñ

kitnā gambhīr hai kohrām sukūt-e-shab kā

koī āvāz kā paikar kahīñ dekhūñ to chalūñ

dosh-e-tūfāñ se koī mauj bulātī hai mujhe

reza reza hai badan ab use chun luuñ to chalūñ

kitnī sadiyoñ kī masāfat abhī baaqī hai 'rashīd'

hāñpte jism kā ye ḳhol utārūñ to chalūñ

ghumbad-e-zat mein ab koi sada dun to chalun

apne soe hue sathi ko jaga lun to chalun

phir bikhar jaunga main rah mein zarron ki tarah

koi paiman-e-wafa KHud se main bandhun to chalun

jaane tu kaun hai kis samt bulata hai mujhe

teri aawaz ki parchhain ko chhu lun to chalun

bujh na jaen tere jalwon ke muqaddas fanus

apne bhige hue daman ko nichoDun to chalun

kitna gambhir hai kohram sukut-e-shab ka

koi aawaz ka paikar kahin dekhun to chalun

dosh-e-tufan se koi mauj bulati hai mujhe

reza reza hai badan ab use chun lun to chalun

kitni sadiyon ki masafat abhi baqi hai 'rashid'

hanpte jism ka ye KHol utarun to chalun