gunahon ki mohabbat ghaT rahi hai

gunāhoñ kī mohabbat ghaT rahī hai

abhī gard-e-kudūrat chhaT rahī hai

hamārī pyaas ko dariyā bhī kam haiñ

magar pyāloñ meñ bas talchhaT rahī hai

sameTe phir rahe haiñ nafrateñ ham

gumāñ ye thā ki ulfat baT rahī hai

zarūrat ḳhuub mahñgī ho ga.ī hai

magar insāñ kī qīmat ghaT rahī hai

jise sun kar dhaḌaktā thā mirā dil

tire qadmoñ kī vo aahaT rahī hai

jahāñ jā kar ham aksar lauT aa.e

Dagar terī tarah panghaT rahī hai

isī meñ gum haiñ merī ārzūeñ

tire māthe kī jo silvaT rahī hai

sukūn-e-dil thā jis kā naam vo shai

na is karvaT na us karvaT rahī hai

koī pūchhe jo tum se haal 'āqib'

kaho al-hamdu-lillah kaT rahī hai

gunahon ki mohabbat ghaT rahi hai

abhi gard-e-kudurat chhaT rahi hai

hamari pyas ko dariya bhi kam hain

magar pyalon mein bas talchhaT rahi hai

sameTe phir rahe hain nafraten hum

guman ye tha ki ulfat baT rahi hai

zarurat KHub mahngi ho gai hai

magar insan ki qimat ghaT rahi hai

jise sun kar dhaDakta tha mera dil

tere qadmon ki wo aahaT rahi hai

jahan ja kar hum aksar lauT aae

Dagar teri tarah panghaT rahi hai

isi mein gum hain meri aarzuen

tere mathe ki jo silwaT rahi hai

sukun-e-dil tha jis ka nam wo shai

na is karwaT na us karwaT rahi hai

koi puchhe jo tum se haal 'aqib'

kaho al-hamdu-lillah kaT rahi hai