ghurur-e-husn ko aks-e-niyaz-e-ashiqi samjhe

ġhurūr-e-husn ko aks-e-niyāz-e-āshiqī samjhe

zahe ġhaflat ki ham ġhaflat ko terī āgahī samjhe

hamārī baat ko jo aap samjhe ham vahī samjhe

magar is āshiqāna maslahat ko aap bhī samjhe

taraqqī-yāfta sūrat jahālat kī hai ilm apnā

jo kuchh samjhe vahī dekhā jo kuchh dekhā vahī samjhe

kuchh is andāz se paidā huā ulfat kā ġham dil meñ

ki ġham hī is ko kah sakte the lekin ham ḳhushī samjhe

unheñ jab rahm aatā hai to mujh par zulm karte haiñ

na samjhā koī fitrat āshiqī kī ik vahī samjhe

hayā-āgīñ sukūt-e-nāz thā iz.hār-e-ulfat par

magar majbūr thī ulfat ki us ko nā-ḳhushī samjhe

qadam ik aur aage rakh maqām-e-hosh sajde se

ḳhudā.ī kī vo ḳhvāhish hai jise sab bandagī samjhe

na samjhā hai na samjhegā zamāna mujh ko ai 'maikash'

kiyā hai jis ne dīvāna jo samjhe to vahī samjhe

ghurur-e-husn ko aks-e-niyaz-e-ashiqi samjhe

zahe ghaflat ki hum ghaflat ko teri aagahi samjhe

hamari baat ko jo aap samjhe hum wahi samjhe

magar is aashiqana maslahat ko aap bhi samjhe

taraqqi-yafta surat jahaalat ki hai ilm apna

jo kuchh samjhe wahi dekha jo kuchh dekha wahi samjhe

kuchh is andaz se paida hua ulfat ka gham dil mein

ki gham hi is ko kah sakte the lekin hum KHushi samjhe

unhen jab rahm aata hai to mujh par zulm karte hain

na samjha koi fitrat aashiqi ki ek wahi samjhe

haya-agin sukut-e-naz tha izhaar-e-ulfat par

magar majbur thi ulfat ki us ko na-KHushi samjhe

qadam ek aur aage rakh maqam-e-hosh sajde se

KHudai ki wo KHwahish hai jise sab bandagi samjhe

na samjha hai na samjhega zamana mujh ko ai 'maikash'

kiya hai jis ne diwana jo samjhe to wahi samjhe