ghurur-e-naz dikha tujh mein kitna jauhar hai

ġhurūr-e-nāz dikhā tujh meñ kitnā jauhar hai

mirā ḳhulūs bhī dariyā nahīñ samundar hai

parakh yahī hai mohabbat kī aañch do us ko

pighal gayā to vo shīsha hai varna patthar hai

ḳhalā-navard ko yaaro farāz-e-manzil kyā

ki ab to us kā har ik par bajā.e shahpar hai

adāvatoñ ko fanā kar diyā mohabbat se

mujāhide meñ mohabbat hī apnā ḳhanjar hai

subūt-e-bai.at-e-pīr-e-haram ye hai to sahī

ki aaj tak kaf-e-dast-rasā munavvar hai

mujhe zarūrat-e-ġhāza nahīñ ki chehre par

mire zamīr kā jo rañg hai ujāgar hai

sitāra-e-sahar-āsār hai jo ai 'ġhausī'

ġhubār-basta abhī us kā pesh-manzar hai

ghurur-e-naz dikha tujh mein kitna jauhar hai

mera KHulus bhi dariya nahin samundar hai

parakh yahi hai mohabbat ki aanch do us ko

pighal gaya to wo shisha hai warna patthar hai

KHala-naward ko yaro faraaz-e-manzil kya

ki ab to us ka har ek par bajae shahpar hai

adawaton ko fana kar diya mohabbat se

mujahide mein mohabbat hi apna KHanjar hai

subut-e-baiat-e-pir-e-haram ye hai to sahi

ki aaj tak kaf-e-dast-rasa munawwar hai

mujhe zarurat-e-ghaza nahin ki chehre par

mere zamir ka jo rang hai ujagar hai

sitara-e-sahar-asar hai jo ai 'ghausi'

ghubar-basta abhi us ka pesh-manzar hai