ghurur naz ada tamkanat-shiari sab

ġhurūr naaz adā tamkanat-shi.ārī sab

mujhe to yaad hai ik ik adā tumhārī sab

bas ek phāñs khaTaktī hai aaj bhī dil meñ

agarche bhar ga.e jitne the zaḳhm-e-kārī sab

ab is khañDar se nayā ik makān ubhregā

ki dafn ho ga.ī malba meñ āh-o-zārī sab

tamāshā aisā dikhā kar chalā gayā koī

ki haath malte rahe der tak madārī sab

hamāre haath se takmīl-e-fan na ho jab tak

vo kaaT saktā nahīñ uñgliyāñ hamārī sab

maiñ jang haar na jaatā to aur kyā kartā

ki thī sipāh mirī hausloñ se aarī sab

ye kis ne aa ke fazā meñ bikher dī ḳhushbū

ki bhuul baiThe dil-o-jāñ kī be-qarārī sab

'ziyā' ye dil kā taqāzā hai aise mausam meñ

maiñ us ko pesh karūñ ijz-o-inkisārī sab

ghurur naz ada tamkanat-shiari sab

mujhe to yaad hai ek ek ada tumhaari sab

bas ek phans khaTakti hai aaj bhi dil mein

agarche bhar gae jitne the zaKHm-e-kari sab

ab is khanDar se naya ek makan ubhrega

ki dafn ho gai malba mein aah-o-zari sab

tamasha aisa dikha kar chala gaya koi

ki hath malte rahe der tak madari sab

hamare hath se takmil-e-fan na ho jab tak

wo kaT sakta nahin ungliyan hamari sab

main jang haar na jata to aur kya karta

ki thi sipah meri hauslon se aari sab

ye kis ne aa ke faza mein bikher di KHushbu

ki bhul baiThe dil-o-jaan ki be-qarari sab

'ziya' ye dil ka taqaza hai aise mausam mein

main us ko pesh karun ijz-o-inkisari sab