ghussa tum par to KHub aata hai

ġhussa tum par to ḳhuub aatā hai

kyā kareñ dil hai maan jaatā hai

apnī kamiyāñ vo dekh saktā nahīñ

bas mujhe aa.inā dikhātā hai

tere chehre ko din meñ sau sau baar

yaad kartī huuñ bhuul jaatā hai

maiñ zabāñ par kharī utartī huuñ

phir bhī vo mujh ko āzmātā hai

muddatoñ pahle kā jo hai bandhan

ishq vo aaj bhī nibhātā hai

terī bātoñ meñ tairtā hai dil

terī sāñsoñ meñ Duub jaatā hai

ab bhī us ke liye savāl huuñ maiñ

bas mujhe joḌtā ghaTātā hai

apne hī intizār meñ har shaam

vo diyā dvaar par jalātā hai

maiñ use yaad kartī rahtī huuñ

'anjanā' sher hotā jaatā hai

ghussa tum par to KHub aata hai

kya karen dil hai man jata hai

apni kamiyan wo dekh sakta nahin

bas mujhe aaina dikhata hai

tere chehre ko din mein sau sau bar

yaad karti hun bhul jata hai

main zaban par khari utarti hun

phir bhi wo mujh ko aazmata hai

muddaton pahle ka jo hai bandhan

ishq wo aaj bhi nibhata hai

teri baaton mein tairta hai dil

teri sanson mein Dub jata hai

ab bhi us ke liye sawal hun main

bas mujhe joDta ghaTata hai

apne hi intizar mein har sham

wo diya dwar par jalata hai

main use yaad karti rahti hun

'anjana' sher hota jata hai