gunga hai ishq phir bhi ye qaul-o-qarar dekh

gūñgā hai 'ishq phir bhī ye qaul-o-qarār dekh

āñkhoñ meñ chal rahe haiñ vo urgent taar dekh

hākim kā ruḳh na dekh su-e-pesh-kār dekh

pahle tū apnī jeb magar bār-bār dekh

marne se dugnī chaugunī paidā.isheñ haiñ aaj

hindostāñ pe rahmat-e-parvardigār dekh

ai husn kyā huiiñ vo tirī parda-dāriyāñ

saḌkoñ pe aa gayā hai tirā ishtihār dekh

le kar vo aa.e barq-e-tajallī to kyā huā

chashma lagā ke dhuup kā be-iḳhtiyār dekh

mushkil meñ hai tabīb ki hai 'ishq lā-'ilāj

aur husn kah rahā hai ki merā buḳhār dekh

yā dāḳhle kā de unheñ yā maut kā ticket

queue meñ khaḌe haiñ kitne hī ummīd-vār dekh

tū jis ko muñh lagā.e mujhe us kī qadr hai

maiñ pī rahā huuñ ye tirā jhūTā cigar dekh

'raushan' sharāb-ḳhāne se tū ruuTh kar na jā

saaqī pukārtā hai tujhe bār-bār dekh

gunga hai 'ishq phir bhi ye qaul-o-qarar dekh

aankhon mein chal rahe hain wo urgent tar dekh

hakim ka ruKH na dekh su-e-pesh-kar dekh

pahle tu apni jeb magar bar-bar dekh

marne se dugni chauguni paidaishen hain aaj

hindostan pe rahmat-e-parwardigar dekh

ai husn kya huin wo teri parda-dariyan

saDkon pe aa gaya hai tera ishtihaar dekh

le kar wo aae barq-e-tajalli to kya hua

chashma laga ke dhup ka be-iKHtiyar dekh

mushkil mein hai tabib ki hai 'ishq la-'ilaj

aur husn kah raha hai ki mera buKHar dekh

ya daKHle ka de unhen ya maut ka ticket

queue mein khaDe hain kitne hi ummid-war dekh

tu jis ko munh lagae mujhe us ki qadr hai

main pi raha hun ye tera jhuTa cigar dekh

'raushan' sharab-KHane se tu ruTh kar na ja

saqi pukarta hai tujhe bar-bar dekh