gunj mere gambhir KHayalon ki mujhse Takraati hai

guuñj mire gambhīr ḳhayāloñ kī mujh se Takrātī hai

āñkheñ band karūñ yā kholūñ bijlī kauñde jaatī hai

tanhā.ī ke dasht se guzro to mumkin hai tum bhī suno

sannāTe kī chīḳh jo mere kānoñ ko pathrātī hai

kal ik nīm-shagufta jism ke qurb se mujh par TuuT paḌī

aadhī raat ko adh-khilī kaliyoñ se jo ḳhush-bū aatī hai

suune gharoñ meñ rahne vaale kundanī chehre kahte haiñ

saarī saarī raat akele-pan kī aag jalātī hai

'sahbā' sāhab dariyā ho to dariyā jaisī baat karo

tez havā se lahar to ik jauhaḌ meñ bhī aa jaatī hai

gunj mere gambhir KHayalon ki mujh se Takraati hai

aankhen band karun ya kholun bijli kaunde jati hai

tanhai ke dasht se guzro to mumkin hai tum bhi suno

sannaTe ki chiKH jo mere kanon ko pathraati hai

kal ek nim-shagufta jism ke qurb se mujh par TuT paDi

aadhi raat ko adh-khili kaliyon se jo KHush-bu aati hai

sune gharon mein rahne wale kundani chehre kahte hain

sari sari raat akele-pan ki aag jalati hai

'sahba' sahab dariya ho to dariya jaisi baat karo

tez hawa se lahar to ek jauhaD mein bhi aa jati hai