guzar gaya jo mere dil pe saneha ban kar

guzar gayā jo mire dil pe sāneha ban kar

utar gayā vo mirī ruuh meñ ḳhudā ban kar

tirā ḳhayāl shab-e-hijr phailtā hī gayā

hazār rañg kī sochoñ kā silsila ban kar

vafā ke sañg se Takrā ke ehtijāj-e-anā

salīb-e-lab pe sisakne lagā duā ban kar

badan ke dasht meñ man kī hasīn sub.hoñ ko

nikal rahā hai ġham-e-dahr azhdahā ban kar

kabhī to diip jaleñ gul khileñ fazā mahke

kabhī to aa shab-e-vīrāñ meñ ratjagā ban kar

tamām umr jise DhūñDte rahe 'ā.alī'

kahīñ milā bhī agar vo to fāsla ban kar

guzar gaya jo mere dil pe saneha ban kar

utar gaya wo meri ruh mein KHuda ban kar

tera KHayal shab-e-hijr phailta hi gaya

hazar rang ki sochon ka silsila ban kar

wafa ke sang se Takra ke ehtijaj-e-ana

salib-e-lab pe sisakne laga dua ban kar

badan ke dasht mein man ki hasin subhon ko

nikal raha hai gham-e-dahr azhdaha ban kar

kabhi to dip jalen gul khilen faza mahke

kabhi to aa shab-e-viran mein ratjaga ban kar

tamam umr jise DhunDte rahe 'aali'

kahin mila bhi agar wo to fasla ban kar