guzar gaya mai-kade ka mausam guzar gaya hai subu ka mausam

guzar gayā mai-kade kā mausam guzar gayā hai subū kā mausam

vo ḳhalvatoñ kā gulāb-mausam vo aarzū kī numū kā mausam

abas hai ab ye tamannā un kī ki zaḳhm saare rafū kareñge

ye chāk-dāman sameT luuñ ab chalā gayā vo rafū kā mausam

ki naam terā kaḌhā ho jis pe usī chunariyā kī aarzū meñ

gañvā.ī bālī-umaryā apnī guzar gayā aarzū kā mausam

tujhe hī fursat na thī mayassar to apnā qissa kise sunāte

so tishna apnī rahī kahānī guzar gayā guftugū kā mausam

ḳhazāne ilm-o-hunar ke pyāre tumhāre apne vajūd meñ haiñ

tumheñ kahāñ justujū kī fursat nahīñ rahā justujū kā mausam

tumhāre purkhoñ kī is zamīñ ko na bād-o-bārāñ kī kuchh kamī thī

tumhāre sarf-e-nazar se lekin havā huā vo numū kā mausam

guzar gaya mai-kade ka mausam guzar gaya hai subu ka mausam

wo KHalwaton ka gulab-mausam wo aarzu ki numu ka mausam

abas hai ab ye tamanna un ki ki zaKHm sare rafu karenge

ye chaak-daman sameT lun ab chala gaya wo rafu ka mausam

ki nam tera kaDha ho jis pe usi chunariya ki aarzu mein

ganwai baali-umarya apni guzar gaya aarzu ka mausam

tujhe hi fursat na thi mayassar to apna qissa kise sunate

so tishna apni rahi kahani guzar gaya guftugu ka mausam

KHazane ilm-o-hunar ke pyare tumhaare apne wajud mein hain

tumhein kahan justuju ki fursat nahin raha justuju ka mausam

tumhaare purkhon ki is zamin ko na baad-o-baran ki kuchh kami thi

tumhaare sarf-e-nazar se lekin hawa hua wo numu ka mausam