guzre hain hum pe aise bhi lamhe kabhi kabhi

guzre haiñ ham pe aise bhī lamhe kabhī kabhī

dil ro paḌā hai sun ke latīfe kabhī kabhī

sahrā se tishnagī kā sabab pūchhte ho kyā

dariyā bhī ham ne dekhe haiñ pyāse kabhī kabhī

gum-karda rāh-e-zīst sahī is ke bāvajūd

pūchhe haiñ ham se ḳhizr ne raste kabhī kabhī

ai nā-ḳhudā-e-vaqt na itnā ġhurūr kar

Duube haiñ sāhiloñ pe safīne kabhī kabhī

har dil ko aap ā.ina-ḳhāna na jāniye

patthar se saḳht hote haiñ shīshe kabhī kabhī

'sumbul' huā hai ye bhī ki ġhazloñ ke ruup meñ

nāzil hue haiñ ham pe sahīfe kabhī kabhī

guzre hain hum pe aise bhi lamhe kabhi kabhi

dil ro paDa hai sun ke latife kabhi kabhi

sahra se tishnagi ka sabab puchhte ho kya

dariya bhi hum ne dekhe hain pyase kabhi kabhi

gum-karda rah-e-zist sahi is ke bawajud

puchhe hain hum se KHizr ne raste kabhi kabhi

ai na-KHuda-e-waqt na itna ghurur kar

Dube hain sahilon pe safine kabhi kabhi

har dil ko aap aaina-KHana na jaaniye

patthar se saKHt hote hain shishe kabhi kabhi

'sumbul' hua hai ye bhi ki ghazlon ke rup mein

nazil hue hain hum pe sahife kabhi kabhi