guzre hue lamhat ko rudad karoge

guzre hue lamhāt ko rūdād karoge

jis vaqt marāsim na.e ījād karoge

gar tark-e-ta'alluq pe baḌā naaz hai tum ko

par ham jo na hoñge to bahut yaad karoge

aksar mirī tasvīr ko āñkhoñ meñ basā kar

toḌoge koī shai koī barbād karoge

ehsās ke mandir meñ mohabbat kā janāza

dekhoge to be-sāḳhta fariyād karoge

dil aap kī yādoñ meñ giraftār rahegā

qaidī ko mukammal kahāñ āzād karoge

manzil ko pahuñch jā.egā bhaTkā huā raahī

jab shahr-e-suḳhanvar koī ābād karoge

tum husn kā 'mehvar' ho zamāne kī nazar meñ

kyā ḳhaak mire baa'd mujhe yaad karoge

guzre hue lamhat ko rudad karoge

jis waqt marasim nae ijad karoge

gar tark-e-ta'alluq pe baDa naz hai tum ko

par hum jo na honge to bahut yaad karoge

aksar meri taswir ko aankhon mein basa kar

toDoge koi shai koi barbaad karoge

ehsas ke mandir mein mohabbat ka janaza

dekhoge to be-saKHta fariyaad karoge

dil aap ki yaadon mein giraftar rahega

qaidi ko mukammal kahan aazad karoge

manzil ko pahunch jaega bhaTka hua rahi

jab shahr-e-suKHanwar koi aabaad karoge

tum husn ka 'mehwar' ho zamane ki nazar mein

kya KHak mere ba'd mujhe yaad karoge