guzre jidhar se nur bikhere chale gae

guzre jidhar se nuur bikhere chale ga.e

vo ham-safar hue to añdhere chale ga.e

ab maiñ huuñ aur shiddat-e-ġham kī hai tez dhuup

un gesuoñ ke saa.e ghanere chale ga.e

mere tafakkurāt ko Dastī rahī thī jo

nāgin chalī ga.ī vo sapere chale ga.e

ummīd ke shajar pe vo halchal nahīñ rahī

chiḌiyāñ ga.iiñ to rain basere chale ga.e

andhe safar ko ghar se maiñ niklā thā dosto

aa.ī jab un kī yaad añdhere chale ga.e

ātish ne mere ghar ko jalāyā to kyā huā

kuchh der ke liye to añdhere chale ga.e

'hasrat' maiñ be-qarār huuñ luTne ke vāste

jaane kahāñ hasīn luTere chale ga.e

guzre jidhar se nur bikhere chale gae

wo ham-safar hue to andhere chale gae

ab main hun aur shiddat-e-gham ki hai tez dhup

un gesuon ke sae ghanere chale gae

mere tafakkuraat ko Dasti rahi thi jo

nagin chali gai wo sapere chale gae

ummid ke shajar pe wo halchal nahin rahi

chiDiyan gain to rain basere chale gae

andhe safar ko ghar se main nikla tha dosto

aai jab un ki yaad andhere chale gae

aatish ne mere ghar ko jalaya to kya hua

kuchh der ke liye to andhere chale gae

'hasrat' main be-qarar hun luTne ke waste

jaane kahan hasin luTere chale gae