guzrenge tere daur se jo kuchh bhi haal ho

guzreñge tere daur se jo kuchh bhī haal ho

ḳhud kaun chāhtā hai ki jiinā muhāl ho

maiñ ne tamām-umr guzārī hai dil ke saath

laao mire huzūr jo amr-e-muhāl ho

ye soch kar fareb-e-mohabbat meñ aa ga.e

ham itne ḳhush kahāñ jo natīja malāl ho

maiñ jaise ajnabī koī apne dayār meñ

tum jaise mere zehn meñ koī savāl ho

dil ke muāmalāt hī yaaro ajiib haiñ

apnī ḳhabar nahīñ hai to kis kā ḳhayāl ho

ham ehtiyāt-e-dīda-o-dil se guzar chuke

aa jaa.e sāmne jo ḳhudā-e-jamāl ho

soz-e-ġham-e-hayāt se 'anjum' gurez kar

lohā nahīñ hai dil jo tapāne se laal ho

guzrenge tere daur se jo kuchh bhi haal ho

KHud kaun chahta hai ki jina muhaal ho

main ne tamam-umr guzari hai dil ke sath

lao mere huzur jo amr-e-muhaal ho

ye soch kar fareb-e-mohabbat mein aa gae

hum itne KHush kahan jo natija malal ho

main jaise ajnabi koi apne dayar mein

tum jaise mere zehn mein koi sawal ho

dil ke muamalat hi yaro ajib hain

apni KHabar nahin hai to kis ka KHayal ho

hum ehtiyat-e-dida-o-dil se guzar chuke

aa jae samne jo KHuda-e-jamal ho

soz-e-gham-e-hayat se 'anjum' gurez kar

loha nahin hai dil jo tapane se lal ho