hae ek shaKHs jise humne bhulaya bhi nahin

haa.e ik shaḳhs jise ham ne bhulāyā bhī nahīñ

yaad aane kī tarah yaad vo aayā bhī nahīñ

jaane kis moḌ pe le aa.ī hameñ terī talab

sar pe sūraj bhī nahīñ raah meñ saayā bhī nahīñ

vaj.h-e-rusvā.ī-e-ehsās huā hai kyā kyā

haa.e vo lafz jo lab tak mire aayā bhī nahīñ

ai mohabbat ye sitam kyā ki judā huuñ ḳhud se

koī aisā mire nazdīk to aayā bhī nahīñ

yā hameñ zulf ke saa.e hī meñ niiñd aatī thī

yā mayassar kisī dīvār kā saayā bhī nahīñ

bār-hā dil tirī qurbat se dhaḌak uTThā hai

go abhī vaqt mohabbat meñ vo aayā bhī nahīñ

aap us shaḳhs ko kyā kahiye ki jis ne 'ummīd'

ġham diyā ġham ko dil-āzār banāyā bhī nahīñ

hae ek shaKHs jise hum ne bhulaya bhi nahin

yaad aane ki tarah yaad wo aaya bhi nahin

jaane kis moD pe le aai hamein teri talab

sar pe suraj bhi nahin rah mein saya bhi nahin

wajh-e-ruswai-e-ehsas hua hai kya kya

hae wo lafz jo lab tak mere aaya bhi nahin

ai mohabbat ye sitam kya ki juda hun KHud se

koi aisa mere nazdik to aaya bhi nahin

ya hamein zulf ke sae hi mein nind aati thi

ya mayassar kisi diwar ka saya bhi nahin

bar-ha dil teri qurbat se dhaDak uTTha hai

go abhi waqt mohabbat mein wo aaya bhi nahin

aap us shaKHs ko kya kahiye ki jis ne 'ummid'

gham diya gham ko dil-azar banaya bhi nahin