hae kaisa nagar udasi ka

haa.e kaisā nagar udāsī kā

har bashar ham-safar udāsī kā

qahqahoñ tak maiñ aa ke baiTh gayā

dekh liije asar udāsī kā

biij Daale na khaad Daalī hai

ug gayā ḳhud shajar udāsī kā

ik to pahle hī ġham ke maare the

aur is par zarar udāsī kā

chun ke ash'ār meñ piroyā hai

maiñ ne har ik guhar udāsī kā

tere jaane ke baa'd jaanā hai

zindagī hai safar udāsī kā

hai agar tū javāb de koī

kaun hai ham-safar udāsī kā

ai ḳhudā bhej de koī rahzan

luuTe mujh se jo zar udāsī kā

log to dil udaas rakhte haiñ

maiñ huuñ puurā bashar udāsī kā

tum agar aa sako to aa jaao

jashn hai mere ghar udāsī kā

hae kaisa nagar udasi ka

har bashar ham-safar udasi ka

qahqahon tak main aa ke baiTh gaya

dekh lije asar udasi ka

bij Dale na khad Dali hai

ug gaya KHud shajar udasi ka

ek to pahle hi gham ke mare the

aur is par zarar udasi ka

chun ke ash'ar mein piroya hai

main ne har ek guhar udasi ka

tere jaane ke ba'd jaana hai

zindagi hai safar udasi ka

hai agar tu jawab de koi

kaun hai ham-safar udasi ka

ai KHuda bhej de koi rahzan

luTe mujh se jo zar udasi ka

log to dil udas rakhte hain

main hun pura bashar udasi ka

tum agar aa sako to aa jao

jashn hai mere ghar udasi ka