hae kya inqilab-e-alam hai

haa.e kyā inqilāb-e-ālam hai

vo jo sho.ala thā aaj shabnam hai

aur kyoñ koī is pe ashk bahā.e

zindagī zindagī kā mātam hai

ham pe jo bītnī thī biit ga.ī

ho agar koī ibn-e-mariyam hai

un kī nazroñ meñ kyā ḳhushī kā vaqār

jin ko ehsās-e-azmat-e-ġham hai

gardish-e-rozgār se pūchho

kaun monis hai kaun hamdam hai

kisī karvaT sukūñ nahīñ us ko

zindagī iztirāb-e-paiham hai

phir ye andesha-e-jarāhat kyoñ

zaḳhm-e-dil be-niyāz-e-marham hai

nahīñ kuchh kam hasīñ ḳhayāl tirā

tū nahīñ hai to mujh ko kyā ġham hai

dil kī azmat ko bhuul kar nādāñ

tū talabgār-e-sāġhar-e-jam hai

dene vaale ne ġham diyā 'tālib'

ye ināyat kisī kī kyā kam hai

hae kya inqilab-e-alam hai

wo jo shoala tha aaj shabnam hai

aur kyon koi is pe ashk bahae

zindagi zindagi ka matam hai

hum pe jo bitni thi bit gai

ho agar koi ibn-e-mariyam hai

un ki nazron mein kya KHushi ka waqar

jin ko ehsas-e-azmat-e-gham hai

gardish-e-rozgar se puchho

kaun monis hai kaun hamdam hai

kisi karwaT sukun nahin us ko

zindagi iztirab-e-paiham hai

phir ye andesha-e-jarahat kyon

zaKHm-e-dil be-niyaz-e-marham hai

nahin kuchh kam hasin KHayal tera

tu nahin hai to mujh ko kya gham hai

dil ki azmat ko bhul kar nadan

tu talabgar-e-saghar-e-jam hai

dene wale ne gham diya 'talib'

ye inayat kisi ki kya kam hai