hae re pyari pyari aankh

haa.e re pyārī pyārī aañkh

matvālī rat-nārī āñkheñ

ġhārat-e-dil par TuuT paḌī hai

shyām-nagar kī kumārī āñkheñ

us ghaḌī dekho in kā aalam

niiñd se jab hoñ bhārī āñkheñ

zahr kabhī haiñ aur kabhī amrit

un kī baaī baaī āñkheñ

jin ko jhapaknā yaad nahīñ hai

hairat kī haiñ vo maarī āñkheñ

taktī haiñ ab tak raah kisī kī

sub.h o shaam shikārī āñkheñ

kaun 'asar' kī nazar meñ samā.e

dekhī hai us ne tumhārī āñkheñ

hae re pyari pyari aankh

matwali rat-nari aankhen

ghaarat-e-dil par TuT paDi hai

shyam-nagar ki kumari aankhen

us ghaDi dekho in ka aalam

nind se jab hon bhaari aankhen

zahr kabhi hain aur kabhi amrit

un ki bai bai aankhen

jin ko jhapakna yaad nahin hai

hairat ki hain wo mari aankhen

takti hain ab tak rah kisi ki

subh o sham shikari aankhen

kaun 'asar' ki nazar mein samae

dekhi hai us ne tumhaari aankhen