hail hai hijab-e-sharm-o-haya didar to kya guftar to kya

haa.il hai hijāb-e-sharm-o-hayā dīdār to kyā guftār to kyā

mub.ham haiñ ishāre sab us ke inkār to kyā iqrār to kyā

altāf-o-karam kī bārish bhī jo mujh pe kare sansār to kyā

jab us ne na pūchhā haal mirā daryāft kareñ aġhyār to kyā

hai dar-ba-darī qismat merī shorīda-sarī tū hī le chal

taskīn-e-dil-e-mahzūñ ke liye gulzār to kyā kohsār to kyā

haiñ azm-e-musāfir ke aage ḳhatrāt masāfat hech bahut

manzil kī talab hai dil meñ agar ho rāhguzar dushvār to kyā

tañg aa ke mohabbat tark na kī ham garche rahe nākām sadā

sarshār the lazzāt-e-hasrat-o-ġham se hote bhalā bezār to kyā

hail hai hijab-e-sharm-o-haya didar to kya guftar to kya

mubham hain ishaare sab us ke inkar to kya iqrar to kya

altaf-o-karam ki barish bhi jo mujh pe kare sansar to kya

jab us ne na puchha haal mera daryaft karen aghyar to kya

hai dar-ba-dari qismat meri shorida-sari tu hi le chal

taskin-e-dil-e-mahzun ke liye gulzar to kya kohsar to kya

hain azm-e-musafir ke aage KHatraat masafat hech bahut

manzil ki talab hai dil mein agar ho rahguzar dushwar to kya

tang aa ke mohabbat tark na ki hum garche rahe nakaam sada

sarshaar the lazzat-e-hasrat-o-gham se hote bhala bezar to kya