haal duniya mein hua rahm ke qabil apna

haal duniyā meñ huā rahm ke qābil apnā

na ḳhasam apnā hai baajī na muā dil apnā

kaise kahte ho nahīñ koī muqābil apnā

ai jī siine meñ TaTolo to zarā dil apnā

hausla kyā karūñ dikhlā.ūñ maiñ kyā dil apnā

marduvā bhī to ho guyyāñ kisī qābil apnā

vaqt kī apne maiñ lailā huuñ vo majnūñ guyyāñ

aur kyā chāhiye chhap jā.egā novel apnā

is se zyāda to maiñ habba nahīñ dene kī unheñ

ghar meñ baiThī vo nikālā kareñ fāzil apnā

sabr bandī kā sameTā kiye marte marte

qabr meñ un kī farishta na ho nāzil apnā

chaar ke kāñdhe pe bolī ye bahishtī biibī

paañv bhī ghar se jo niklā to ba-mushkil apnā

ek se laakh tak inkār nahīñ karne kī

lā ke dikhlā.eñ to mujh ko vo zarā bill apnā

kahīñ āñkhoñ se na ojhal koī tinkā ho jaa.e

rakheñ asbāb nigāhoñ meñ vo til til apnā

sāseñ duniyā meñ kahīñ sachchī huī haiñ beTā

ham bhī jhūTe sahī da.avā bhī hai bātil apnā

raat charrā.ī thī phir aglī mohabbat un kī

mujh ko paḌh paḌh ke sunāyā kiye novel apnā

joñk patthar meñ nahīñ lagtī hai ye sach hai magar

kaise kar le koī terā sā mue dil apnā

ek se ek zamāne meñ paḌe haiñ 'shaidā'

kaise kahte ho nahīñ koī muqābil apnā

haal duniya mein hua rahm ke qabil apna

na KHasam apna hai baji na mua dil apna

kaise kahte ho nahin koi muqabil apna

ai ji sine mein TaTolo to zara dil apna

hausla kya karun dikhlaun main kya dil apna

marduwa bhi to ho guyyan kisi qabil apna

waqt ki apne main laila hun wo majnun guyyan

aur kya chahiye chhap jaega nowel apna

is se zyaada to main habba nahin dene ki unhen

ghar mein baiThi wo nikala karen fazil apna

sabr bandi ka sameTa kiye marte marte

qabr mein un ki farishta na ho nazil apna

chaar ke kandhe pe boli ye bahishti bibi

panw bhi ghar se jo nikla to ba-mushkil apna

ek se lakh tak inkar nahin karne ki

la ke dikhlaen to mujh ko wo zara bill apna

kahin aankhon se na ojhal koi tinka ho jae

rakhen asbab nigahon mein wo til til apna

sasen duniya mein kahin sachchi hui hain beTa

hum bhi jhuTe sahi dawa bhi hai baatil apna

raat charrai thi phir agli mohabbat un ki

mujh ko paDh paDh ke sunaya kiye nowel apna

jonk patthar mein nahin lagti hai ye sach hai magar

kaise kar le koi tera sa mue dil apna

ek se ek zamane mein paDe hain 'shaida'

kaise kahte ho nahin koi muqabil apna