haalat ke maron se yun mauj-e-bala uljhe

hālāt ke māroñ se yuuñ mauj-e-balā uljhe

jaise ki charāġhoñ se rah rah ke havā uljhe

kuchh nazm-e-chaman badle hangāma bhī ho barpā

gar sho’la-bayānoñ se bebas kī sadā uljhe

ḳhushbū ho fazāoñ meñ ḳhush-rang nazāre hoñ

dāmān-e-gul-e-tar se jab bād-e-sabā uljhe

har shaam uThātī hai sar tīra-shabī apnā

har raat añdhere se sham'oñ kī ziyā uljhe

dīvāne kī nazroñ meñ kyā chiiz hai jāñ-sozī

kah do na vafāoñ se ab teġh-e-jafā uljhe

yuuñ harf na aa jaa.e gulshan meñ bahāroñ par

ab aur na phūloñ se kāñToñ kī ridā uljhe

kyā hogā zarā socho 'resham' sar-e-mahfil jab

ḳhuddār tabī'at se gesū-e-anā uljhe

haalat ke maron se yun mauj-e-bala uljhe

jaise ki charaghon se rah rah ke hawa uljhe

kuchh nazm-e-chaman badle hangama bhi ho barpa

gar sho’la-bayanon se bebas ki sada uljhe

KHushbu ho fazaon mein KHush-rang nazare hon

daman-e-gul-e-tar se jab baad-e-saba uljhe

har sham uThati hai sar tira-shabi apna

har raat andhere se sham'on ki ziya uljhe

diwane ki nazron mein kya chiz hai jaan-sozi

kah do na wafaon se ab tegh-e-jafa uljhe

yun harf na aa jae gulshan mein bahaaron par

ab aur na phulon se kanTon ki rida uljhe

kya hoga zara socho 'resham' sar-e-mahfil jab

KHuddar tabi'at se gesu-e-ana uljhe