haalat ki talKHi se hain jhunjhlae hue log

hālāt kī talḳhī se haiñ jhuñjhlā.e hue log

muflis kī tarah jholiyāñ phailā.e hue log

apnoñ ne hī siine se lagāyā nahīñ jin ko

ab jaa.eñ kidhar 'ishq meñ Thukrā.e hue log

ye uun kī Dorī nahīñ lamhoñ meñ jo khul jaa.e

suljheñge baḌī der se uljhā.e hue log

ārām se sote haiñ shikam-ser parinde

aur jāgte rahte haiñ ye ghabrā.e hue log

raaz apne kisī shaḳhs pe vā kar nahīñ sakte

ham jurm-e-mohabbat kī sazā paa.e hue log

ye dhuup to phūloñ ko bhī khilne nahīñ detī

rahte haiñ mire des meñ murjhā.e hue log

ye zindagī hai jāgtī āñkhoñ kā koī ḳhvāb

'tamsīla' samajhte nahīñ uktā.e hue log

haalat ki talKHi se hain jhunjhlae hue log

muflis ki tarah jholiyan phailae hue log

apnon ne hi sine se lagaya nahin jin ko

ab jaen kidhar 'ishq mein Thukrae hue log

ye un ki Dori nahin lamhon mein jo khul jae

suljhenge baDi der se uljhae hue log

aaram se sote hain shikam-ser parinde

aur jagte rahte hain ye ghabrae hue log

raaz apne kisi shaKHs pe wa kar nahin sakte

hum jurm-e-mohabbat ki saza pae hue log

ye dhup to phulon ko bhi khilne nahin deti

rahte hain mere des mein murjhae hue log

ye zindagi hai jagti aankhon ka koi KHwab

'tamsila' samajhte nahin uktae hue log