haalat ki ujDi mahfil mein ab koi sulagta saz nahin

hālāt kī ujḌī mahfil meñ ab koī sulagtā saaz nahīñ

naġhme to lapakte haiñ lekin sho.aloñ sā kahīñ andāz nahīñ

har barg-e-hasīñ ko dete haiñ zaḳhmoñ ke mahakte nazrāne

kāñToñ se baḌā is gulshan meñ phūloñ kā koī dam-sāz nahīñ

yā sāya-e-gul kā hai ye karam yā farq hai daane paanī kā

panchhī to vahī haiñ gulshan meñ pahlī sī magar parvāz nahīñ

marqad sā banā hai ḳhushbū kā muñh band kalī ke siine meñ

ai shām-e-gulistāñ tū hī batā ye bhī to kisī kā raaz nahīñ

chhilke na subū aur jhuum uTheñ qatra na mile aur pyaas bujhe

ye zarf hai piine vāloñ kā saaqī kā koī e.ajāz nahīñ

ai sehn-e-chaman ke zindānī kar jashn-e-tarab kī tayyārī

bajte haiñ bahāroñ ke kañgan zanjīr kī ye āvāz nahīñ

haalat ki ujDi mahfil mein ab koi sulagta saz nahin

naghme to lapakte hain lekin shoalon sa kahin andaz nahin

har barg-e-hasin ko dete hain zaKHmon ke mahakte nazrane

kanTon se baDa is gulshan mein phulon ka koi dam-saz nahin

ya saya-e-gul ka hai ye karam ya farq hai dane pani ka

panchhi to wahi hain gulshan mein pahli si magar parwaz nahin

marqad sa bana hai KHushbu ka munh band kali ke sine mein

ai sham-e-gulistan tu hi bata ye bhi to kisi ka raaz nahin

chhilke na subu aur jhum uThen qatra na mile aur pyas bujhe

ye zarf hai pine walon ka saqi ka koi eajaz nahin

ai sehn-e-chaman ke zindani kar jashn-e-tarab ki tayyari

bajte hain bahaaron ke kangan zanjir ki ye aawaz nahin