haalat se farar ki kya justuju karen

hālāt se farār kī kyā justujū kareñ

juz ye ki sheher-e-dār meñ jashn-e-subū kareñ

aao ilāj-e-talḳhi-e-kām-o-gulū kareñ

kuchh der shuġhl-e-jām rahe guftugū kareñ

apne karam se kyā vo hameñ surḳh-rū kareñ

ham aise bad-mizāj ki dil ko lahū kareñ

pahchān bhī na pā.eñge aap apnī shakl ko

TuuTā hai dil kā ā.īna kyā rū-ba-rū kareñ

kuchh faisla na ho sakā ab kī bahār meñ

dāman ko taar taar kareñ yā rafū kareñ

dast-e-junūñ to ban chukā mashshātā-e-chaman

pā-e-junūñ se dasht ko ab surḳh-rū kareñ

dar mai-kade kā band haram kā charāġh gul

ḳhūn-e-jigar piyeñ ki lahū se vazū kareñ

kyā din the dil kī bātoñ se miltā thā jab sukūñ

patthar se kis umiid pe ab guftugū kareñ

vo motiyoñ se karte haiñ muñh shā.iroñ kā band

aise meñ kyā ham apne ko be-ābrū kareñ

kis ko dimāġh-e-fikr kise fursat-e-suḳhan

phir kis liye zamāne ko apnā udū kareñ

'vāmiq' se iltifāt kā matlab yahī to hai

kuchh der sher-ver suneñ hā-o-hū kareñ

haalat se farar ki kya justuju karen

juz ye ki sheher-e-dar mein jashn-e-subu karen

aao ilaj-e-talKHi-e-kaam-o-gulu karen

kuchh der shughl-e-jam rahe guftugu karen

apne karam se kya wo hamein surKH-ru karen

hum aise bad-mizaj ki dil ko lahu karen

pahchan bhi na paenge aap apni shakl ko

TuTa hai dil ka aaina kya ru-ba-ru karen

kuchh faisla na ho saka ab ki bahaar mein

daman ko tar tar karen ya rafu karen

dast-e-junun to ban chuka mashshata-e-chaman

pa-e-junun se dasht ko ab surKH-ru karen

dar mai-kade ka band haram ka charagh gul

KHun-e-jigar piyen ki lahu se wazu karen

kya din the dil ki baaton se milta tha jab sukun

patthar se kis umid pe ab guftugu karen

wo motiyon se karte hain munh shairon ka band

aise mein kya hum apne ko be-abru karen

kis ko dimagh-e-fikr kise fursat-e-suKHan

phir kis liye zamane ko apna udu karen

'wamiq' se iltifat ka matlab yahi to hai

kuchh der sher-wer sunen ha-o-hu karen