haalat use dil ki na dikhai na zaban ki

hālat use dil kī na dikhā.ī na zabāñ kī

ḳhair us ne na kī baat to ham ne bhī kahāñ kī

pahle to hañsā zor se phir āh-o-fuġhāñ kī

mastī meñ qalandar ne baḌī duur kī haañ kī

allāh kā banda koī ghar se nahīñ niklā

tafsīr sabhī karte rahe kaun-o-makāñ kī

ek us kā sarāpā hai ki bas meñ nahīñ aatā

kyā ho ga.ī hālat mire andāz-e-bayāñ kī

ek ek sitamgar ko tasavvur meñ bulā kar

shamshīr-e-zabāñ ham ne bhī kal ḳhuub ravāñ kī

tūfān-e-ma.ānī mire har lafz ke pīchhe

tezī hai har ik sher meñ dillī kī zabāñ kī

sahrā-e-adam kā bhī 'shujā' ḳhuub maza hai

tum sochte rahte ho faqat gulshan-e-jāñ kī

haalat use dil ki na dikhai na zaban ki

KHair us ne na ki baat to hum ne bhi kahan ki

pahle to hansa zor se phir aah-o-fughan ki

masti mein qalandar ne baDi dur ki han ki

allah ka banda koi ghar se nahin nikla

tafsir sabhi karte rahe kaun-o-makan ki

ek us ka sarapa hai ki bas mein nahin aata

kya ho gai haalat mere andaz-e-bayan ki

ek ek sitamgar ko tasawwur mein bula kar

shamshir-e-zaban hum ne bhi kal KHub rawan ki

tufan-e-maani mere har lafz ke pichhe

tezi hai har ek sher mein dilli ki zaban ki

sahra-e-adam ka bhi 'shuja' KHub maza hai

tum sochte rahte ho faqat gulshan-e-jaan ki