hamid kahan ki dauD ke jaun KHabar ko main

hāmid kahāñ ki dauḌ ke jā.ūñ ḳhabar ko maiñ

kis aarzū pe qat' karūñ is safar ko maiñ

maanā burī ḳhabar hai pa terī ḳhabar to hai

sabr-o-qarār nazr karūñ nāma-bar ko maiñ

ye sang-o-ḳhisht aah dilāte haiñ terī yaad

rotā huuñ dekh dekh ke dīvār-o-dar ko maiñ

hai terī shakl yā tirī āvāz kā ḳhayāl

kartā huuñ iltifāt yakāyak jidhar ko maiñ

afsos haa.e haa.e kī aatī nahīñ sadā

pūchhe to kyā batā.ūñ tire chāra-gar ko maiñ

kyā ho gayā ise ki tujhe dekhtī nahīñ

jī chāhtā hai aag lagā duuñ nazar ko maiñ

achchhā jo tū ne gosha-e-marqad kiyā pasand

ab apne haq meñ gor banā.ūñgā ghar ko maiñ

tere sar-e-azīz kī bālish ho ḳhaak se

bālīn-e-ġham se ab na uThā.ūñgā sar ko maiñ

dekhī na thī bahār abhī tere shabāb kī

bhūlā na thā abhī tire ahd-e-siġhar ko maiñ

taqdīr hī ne haa.e na kī kuchh musā.idat

kyā ro.uuñ ab duā-o-davā ke asar ko maiñ

hukm-e-ḳhudā yahī thā ki baiThā kiyā karūñ

mātam meñ tere ashk-fishāñ chashm-e-tar ko maiñ

juz dard-o-dāġh tū ne na chhoḌā nishān haif

rakhūñgā mehmān inheñ 'umr bhar ko maiñ

kar ne do āh-o-nāla ki āḳhir rahūñgā baiTh

taslīm kar ke hukm-e-qazā-o-qadar ko maiñ

kyā fikr-e-āb-o-nān ki ġham kah rahā hai ab

maujūd huuñ ziyāfat-e-dil aur jigar ko maiñ

tujh ko javār-e-rahmat-e-haq meñ jagah mile

māñgā karūñgā ab ye du'ā har sehr ko meñ

habs-e-davām to nahīñ duniyā ki mar rahūñ

kaahe ko ghar ḳhayāl karūñ rahguzar ko maiñ

ḳhud ham se bhī ziyāda ho jo ham pe mehrbāñ

vo jām-e-zahr de to na chakhūñ shakar ko maiñ

vo jaane aur us kī razā jo pasand ho

sab kaam sauñptā huuñ usī dād-gar ko maiñ

hotā na dil meñ dard to kartā na haa.e haa.e

detā na tuul yuuñ suḳhan-e-muḳhtasar ko maiñ

hamid kahan ki dauD ke jaun KHabar ko main

kis aarzu pe qat' karun is safar ko main

mana buri KHabar hai pa teri KHabar to hai

sabr-o-qarar nazr karun nama-bar ko main

ye sang-o-KHisht aah dilate hain teri yaad

rota hun dekh dekh ke diwar-o-dar ko main

hai teri shakl ya teri aawaz ka KHayal

karta hun iltifat yakayak jidhar ko main

afsos hae hae ki aati nahin sada

puchhe to kya bataun tere chaara-gar ko main

kya ho gaya ise ki tujhe dekhti nahin

ji chahta hai aag laga dun nazar ko main

achchha jo tu ne gosha-e-marqad kiya pasand

ab apne haq mein gor banaunga ghar ko main

tere sar-e-aziz ki baalish ho KHak se

baalin-e-gham se ab na uThaunga sar ko main

dekhi na thi bahaar abhi tere shabab ki

bhula na tha abhi tere ahd-e-sighar ko main

taqdir hi ne hae na ki kuchh musaidat

kya roun ab dua-o-dawa ke asar ko main

hukm-e-KHuda yahi tha ki baiTha kiya karun

matam mein tere ashk-fishan chashm-e-tar ko main

juz dard-o-dagh tu ne na chhoDa nishan haif

rakhunga mehman inhen 'umr bhar ko main

kar ne do aah-o-nala ki aaKHir rahunga baiTh

taslim kar ke hukm-e-qaza-o-qadar ko main

kya fikr-e-ab-o-nan ki gham kah raha hai ab

maujud hun ziyafat-e-dil aur jigar ko main

tujh ko jawar-e-rahmat-e-haq mein jagah mile

manga karunga ab ye du'a har sehr ko mein

habs-e-dawam to nahin duniya ki mar rahun

kahe ko ghar KHayal karun rahguzar ko main

KHud hum se bhi ziyaada ho jo hum pe mehrban

wo jam-e-zahr de to na chakhun shakar ko main

wo jaane aur us ki raza jo pasand ho

sab kaam saunpta hun usi dad-gar ko main

hota na dil mein dard to karta na hae hae

deta na tul yun suKHan-e-muKHtasar ko main