han dard-e-nihan rang ki tabir se puchho

haañ dard-e-nihāñ rañg kī ta.abīr se pūchho

dil par jo lagī choT vo tāsīr se pūchho

ā.īn-e-vafā tauq-e-gulū-gīr se pūchho

tamkīn-e-junūñ paañv kī zanjīr se pūchho

nāmūs-e-mohabbat kī qayāmat ko ḳhabar kyā

tum merī tabāhī marī taqdīr se pūchho

lo sehr-e-nazar mudda.ī-e-ġhārat-e-dil hai

kyā pūchhte ho shoḳhī-e-taqrīr se pūchho

maanā ki mujhe zahr pilāne kī hai tadbīr

pahle marī mahrūmī-e-taqdīr se pūchho

kuchh naaz hai ik taaza havas par mujhe dekho

kuchh yaas hai bigḌī huī tadbīr se pūchho

tum chain se baiThe ho havādis kī ḳhabar kyā

nairañg-e-jahāñ gardish-e-taqdīr se pūchho

shoḳhī se vahāñ rañg-e-suḳhan jam nahīñ saktā

tamkīñ meñ hai jo baat vo tasvīr se pūchho

kaafī hai vahāñ rāz-e-mohabbat ko ishārā

taqrīr nahīñ parda-e-tahrīr se pūchho

kyā jaane koī zalzala-e-sā.at-e-mahshar

lo aao idhar āshiq-e-dil-gīr se pūchho

begāna-o-be-dard haiñ arbāb-e-tamāshā

to halqa-e-fitrāk ko naḳhchīr se pūchho

phir maiñ huuñ vafā aur vahī āġhāz-e-tamannā

anjām ko nākāmī-e-taqdīr se pūchho

han dard-e-nihan rang ki tabir se puchho

dil par jo lagi choT wo tasir se puchho

aain-e-wafa tauq-e-gulu-gir se puchho

tamkin-e-junun panw ki zanjir se puchho

namus-e-mohabbat ki qayamat ko KHabar kya

tum meri tabahi mari taqdir se puchho

lo sehr-e-nazar muddai-e-ghaarat-e-dil hai

kya puchhte ho shoKHi-e-taqrir se puchho

mana ki mujhe zahr pilane ki hai tadbir

pahle mari mahrumi-e-taqdir se puchho

kuchh naz hai ek taza hawas par mujhe dekho

kuchh yas hai bigDi hui tadbir se puchho

tum chain se baiThe ho hawadis ki KHabar kya

nairang-e-jahan gardish-e-taqdir se puchho

shoKHi se wahan rang-e-suKHan jam nahin sakta

tamkin mein hai jo baat wo taswir se puchho

kafi hai wahan raaz-e-mohabbat ko ishaara

taqrir nahin parda-e-tahrir se puchho

kya jaane koi zalzala-e-saat-e-mahshar

lo aao idhar aashiq-e-dil-gir se puchho

begana-o-be-dard hain arbab-e-tamasha

to halqa-e-fitrak ko naKHchir se puchho

phir main hun wafa aur wahi aaghaz-e-tamanna

anjam ko nakaami-e-taqdir se puchho