han han ghalat hai ye faqat jo jalwa-gar aankhon mein hai

haañ haañ ġhalat hai ye faqat jo jalva-gar āñkhoñ meñ hai

is dil meñ terī raah hai terā guzar āñkhoñ meñ hai

jalve kī terī aarzū hasrat tire dīdār kī

ab raat din har ik ghaḌī āThoñ pahar āñkhoñ meñ hai

is tarah chhup kar kyoñ mileñ is tarah chhup kar kyoñ raheñ

ab vo hamāre sāmne aa.eñ agar āñkhoñ meñ hai

roz-e-azal sūrat tirī dekhe hue muddat huī

ab tak vahī jalva tirā shām-o-sahar āñkhoñ meñ hai

muddat se maiñ yuuñ hī bhaTaktā phir rahā huuñ dar-ba-dar

kis kī talāsh āñkhoñ ko hai kaisā safar āñkhoñ meñ hai

mujh ko zarūrat hī nahīñ paḌtī kisī tasvīr kī

jab tak mirā mahbūb merā ham-safar āñkhoñ meñ hai

rāh-e-mohabbat meñ koī rahbar nahīñ apnā miyāñ

bas dekhnā ye hai mujhe kitnā hunar āñkhoñ meñ hai

sun 'munfarid' kyoñ zaar phirtā hai tū nāhaq kū-ba-kū

jis kī hai tujh ko justujū vo be-ḳhabar āñkhoñ meñ hai

han han ghalat hai ye faqat jo jalwa-gar aankhon mein hai

is dil mein teri rah hai tera guzar aankhon mein hai

jalwe ki teri aarzu hasrat tere didar ki

ab raat din har ek ghaDi aaThon pahar aankhon mein hai

is tarah chhup kar kyon milen is tarah chhup kar kyon rahen

ab wo hamare samne aaen agar aankhon mein hai

roz-e-azal surat teri dekhe hue muddat hui

ab tak wahi jalwa tera sham-o-sahar aankhon mein hai

muddat se main yun hi bhaTakta phir raha hun dar-ba-dar

kis ki talash aankhon ko hai kaisa safar aankhon mein hai

mujh ko zarurat hi nahin paDti kisi taswir ki

jab tak mera mahbub mera ham-safar aankhon mein hai

rah-e-mohabbat mein koi rahbar nahin apna miyan

bas dekhna ye hai mujhe kitna hunar aankhon mein hai

sun 'munfarid' kyon zar phirta hai tu nahaq ku-ba-ku

jis ki hai tujh ko justuju wo be-KHabar aankhon mein hai