han kahish-e-fuzul ka hasil bhi kuchh nahin

haañ kāhish-e-fuzūl kā hāsil bhī kuchh nahīñ

lekin hayāt be-ḳhalish-e-dil bhī kuchh nahīñ

ab soch lo qadam haiñ ziyāñ-gāh-e-shauq meñ

kahnā na phir ki jazba-e-kāmil bhī kuchh nahīñ

gahrā sukūt chaap kī āvāz-e-bāzgasht

rah meñ bhī kuchh na thā sar-e-manzil bhī kuchh nahīñ

juz hirs-e-manfa.at tah-e-dariyā bhī kuchh na thā

juz vahm-e-āfiyat lab-e-sāhil bhī kuchh nahīñ

sab jazb-e-ārzū kī tamāzat kā khel hai

dil sard ho to garmī-e-mahfil bhī kuchh nahīñ

badle to ik namūna-e-e'rāz-o-ehtirāz

yuuñ us nigah kī raah meñ haa.il bhī kuchh nahīñ

'gauhar' ḳhalā meñ ghūrte phirte ho ab kaho

kyā sach hai bhūlnā use mushkil bhī kuchh nahīñ

han kahish-e-fuzul ka hasil bhi kuchh nahin

lekin hayat be-KHalish-e-dil bhi kuchh nahin

ab soch lo qadam hain ziyan-gah-e-shauq mein

kahna na phir ki jazba-e-kaamil bhi kuchh nahin

gahra sukut chap ki aawaz-e-bazgasht

rah mein bhi kuchh na tha sar-e-manzil bhi kuchh nahin

juz hirs-e-manfat tah-e-dariya bhi kuchh na tha

juz wahm-e-afiyat lab-e-sahil bhi kuchh nahin

sab jazb-e-arzu ki tamazat ka khel hai

dil sard ho to garmi-e-mahfil bhi kuchh nahin

badle to ek namuna-e-e'raaz-o-ehtiraaz

yun us nigah ki rah mein hail bhi kuchh nahin

'gauhar' KHala mein ghurte phirte ho ab kaho

kya sach hai bhulna use mushkil bhi kuchh nahin