han kabhi ruh ko naKHchir nahin kar sakta

haañ kabhī ruuh ko naḳhchīr nahīñ kar saktā

tujh zabāñ ne jo kiyā tiir nahīñ kar saktā

chāñd hotā to ye mumkin thā magar chāñd nahīñ

so maiñ us shaḳhs ko tasḳhīr nahīñ kar saktā

maiñ kahāñ aur ye āyāt-e-ḳhad-o-ḳhāl kahāñ

mus.haf-e-husn maiñ tafsīr nahīñ kar saktā

aañkh ne dekhā sar-e-shām vo manzar 'fartāsh'

karnā chāhūñ bhī to tasvīr nahīñ kar saktā

han kabhi ruh ko naKHchir nahin kar sakta

tujh zaban ne jo kiya tir nahin kar sakta

chand hota to ye mumkin tha magar chand nahin

so main us shaKHs ko tasKHir nahin kar sakta

main kahan aur ye aayat-e-KHad-o-KHal kahan

mushaf-e-husn main tafsir nahin kar sakta

aankh ne dekha sar-e-sham wo manzar 'fartash'

karna chahun bhi to taswir nahin kar sakta