han usi din dhup mein haryaliyan shamil huin

haañ usī din dhuup meñ haryāliyāñ shāmil huiiñ

is zamīñ kī zardiyoñ meñ lāliyāñ shāmil huiiñ

bād-e-āzādī meñ ham sab nāchne vāloñ ke saath

phuul pahne raqs kartī Dāliyāñ shāmil huiiñ

bū-e-gul se jāniye kyuuñ bū-e-ḳhūñ aane lagī

baaġh meñ jab se tirī rakhvāliyāñ shāmil huiiñ

qahr to us vaqt TuuTā thā saf-e-a.adā meñ jab

chashm-o-lab se qatl karne vāliyāñ shāmil huiiñ

ḳhair ko shar aur shar ko ḳhair karne meñ yahāñ

jāniye kin kin kī bad-a.amāliyāñ shāmil huiiñ

itnā pyārā ho gayā huuñ dostoñ ko kyā kahūñ

jab bhī merā zikr aayā gāliyāñ shāmil huiiñ

han usi din dhup mein haryaliyan shamil huin

is zamin ki zardiyon mein laliyan shamil huin

baad-e-azadi mein hum sab nachne walon ke sath

phul pahne raqs karti Daliyan shamil huin

bu-e-gul se jaaniye kyun bu-e-KHun aane lagi

bagh mein jab se teri rakhwaliyan shamil huin

qahr to us waqt TuTa tha saf-e-ada mein jab

chashm-o-lab se qatl karne waliyan shamil huin

KHair ko shar aur shar ko KHair karne mein yahan

jaaniye kin kin ki bad-amaliyan shamil huin

itna pyara ho gaya hun doston ko kya kahun

jab bhi mera zikr aaya galiyan shamil huin