hasil-e-firdaus to ho jae virana abhi

hāsil-e-firdaus to ho jaa.e vīrāna abhī

mā.il-e-girya nahīñ hai terā dīvāna abhī

ḳhatm to ho jaa.e kufr-e-imtiyāzāt-e-nazar

log haiñ nā-mahram-e-ādāb-e-mai-ḳhāna abhī

maiñ badal to duuñ zamāne kā ye farsūda nizām

mujh tak aaya hī nahīñ ai dost paimāna abhī

aag meñ jal kar visāl-e-dost hotā hai nasīb

hai tavāf-e-sham’ meñ masrūf parvāna abhī

'ishq kā markaz kahāñ aur dasht-paimā.ī kahāñ

apnī manzil se bahut pīchhe hai dīvāna abhī

TūTne paa.e na yā-rab āñsuoñ kā silsila

nā-mukammal hai ġham-e-'āshiq kā afsāna abhī

hosh aate hī maiñ kis zulmat-kade meñ aa gayā

thā qarīb-e-māh-o-anjum merā kāshāna abhī

lab pe aatī baat kah to duuñ magar samjhegā kaun

ek 'ālam hai suḳhan-fahmī se begāna abhī

aaj tishna rah na jaa.e 'bismil'-e-sahbā-parast

raat baaqī hai abhī raqsāñ hai paimāna abhī

hasil-e-firdaus to ho jae virana abhi

mail-e-girya nahin hai tera diwana abhi

KHatm to ho jae kufr-e-imtiyazat-e-nazar

log hain na-mahram-e-adab-e-mai-KHana abhi

main badal to dun zamane ka ye farsuda nizam

mujh tak aaya hi nahin ai dost paimana abhi

aag mein jal kar visal-e-dost hota hai nasib

hai tawaf-e-sham’ mein masruf parwana abhi

'ishq ka markaz kahan aur dasht-paimai kahan

apni manzil se bahut pichhe hai diwana abhi

TuTne pae na ya-rab aansuon ka silsila

na-mukammal hai gham-e-'ashiq ka afsana abhi

hosh aate hi main kis zulmat-kade mein aa gaya

tha qarib-e-mah-o-anjum mera kashana abhi

lab pe aati baat kah to dun magar samjhega kaun

ek 'alam hai suKHan-fahmi se begana abhi

aaj tishna rah na jae 'bismil'-e-sahba-parast

raat baqi hai abhi raqsan hai paimana abhi