hasil-e-ilm-e-bashar jahl ka irfan hona

hāsil-e-ilm-e-bashar jahl kā irfāñ honā

umr bhar aql se sīkhā kiye nādāñ honā

chaar zanjīr-e-anāsir pe hai zindāñ mauqūf

vahshat-e-ishq zarā silsila-e-jumbāñ honā

jamā kartā huuñ girebāñ ke nikāle hue taar

yaad aayā hai mujhe sar-ba-garebāñ honā

dil bas ik larzish-e-paiham hai sarāpā yaanī

tere ā.īna ko aatā nahīñ hairāñ honā

fāl-afzūdni-e-mushkil hai har āsāni-e-kār

merī mushkil ko mubārak nahīñ āsāñ honā

rāhat-e-anjām-e-ġham aur rāht-e-duniyā mālūm

likh diyā dil ke muqaddar meñ pareshāñ honā

de tirā husn-e-taġhāful jise hai chāhe fareb

varna tū aur jafāoñ pe pashīmāñ honā

haa.e vo jalva-e-aiman vo nigāh-e-sar-e-tūr

fitnā-sāmāñ se tirā fitna-e-sāmāñ honā

ḳhāk-e-'fānī' kī qasam hai tujhe ai dasht-e-junūñ

kis se sīkhā tire zarroñ ne bayābāñ honā

hasil-e-ilm-e-bashar jahl ka irfan hona

umr bhar aql se sikha kiye nadan hona

chaar zanjir-e-anasir pe hai zindan mauquf

wahshat-e-ishq zara silsila-e-jumban hona

jama karta hun gireban ke nikale hue tar

yaad aaya hai mujhe sar-ba-gareban hona

dil bas ek larzish-e-paiham hai sarapa yani

tere aaina ko aata nahin hairan hona

fal-afzudni-e-mushkil hai har aasani-e-kar

meri mushkil ko mubarak nahin aasan hona

rahat-e-anjam-e-gham aur raht-e-duniya malum

likh diya dil ke muqaddar mein pareshan hona

de tera husn-e-taghaful jise hai chahe fareb

warna tu aur jafaon pe pashiman hona

hae wo jalwa-e-aiman wo nigah-e-sar-e-tur

fitna-saman se tera fitna-e-saman hona

KHak-e-'fani' ki qasam hai tujhe ai dasht-e-junun

kis se sikha tere zarron ne bayaban hona