hath hathon mein liye duniya ghumati hui nazm

haath hāthoñ meñ liye duniyā ghumātī huī nazm

haath aa.ī hai falak paar dikhātī huī nazm

ghar meñ baiThā huā rah jā.egā bahrā shā'ir

aage baḌh jā.egī āvāz lagātī huī nazm

chhoḌ detā huuñ sabhī kaam vahīñ ek taraf

dekh letā huuñ jahāñ duur se aatī huī nazm

she'r baiThā hai vahāñ sub.h se auzār liye

raat jis chauk meñ thī jism luTātī huī nazm

ek shā'ir kī mohabbat bhī hai vo shā'era bhī

yuuñ samajh lījiye ik nazm sunātī huī nazm

tū ne dekhe haiñ kabhī vajd meñ aa.e hue lafz

tū ne dekhī hai kabhī 'arsh hilātī huī nazm

tel ke hauz se nikle haiñ sabhī log vahāñ

maiñ ne rakhnī hai jahāñ aag lagātī huī nazm

gāḌiyāñ dauḌ paḌīñ sabz huā juuñ signal

rah ga.ī pīchhe kahīñ aañkh milātī huī nazm

shā.iro koī savālāt uThātā huā she'r

shā.iro koī sar-e-dār bulātī huī nazm

ḳhud se Dartā huā sahmā huā rotā huā maiñ

chup karātī huī siine se lagātī huī nazm

hath hathon mein liye duniya ghumati hui nazm

hath aai hai falak par dikhati hui nazm

ghar mein baiTha hua rah jaega bahra sha'ir

aage baDh jaegi aawaz lagati hui nazm

chhoD deta hun sabhi kaam wahin ek taraf

dekh leta hun jahan dur se aati hui nazm

she'r baiTha hai wahan subh se auzar liye

raat jis chauk mein thi jism luTati hui nazm

ek sha'ir ki mohabbat bhi hai wo sha'era bhi

yun samajh lijiye ek nazm sunati hui nazm

tu ne dekhe hain kabhi wajd mein aae hue lafz

tu ne dekhi hai kabhi 'arsh hilati hui nazm

tel ke hauz se nikle hain sabhi log wahan

main ne rakhni hai jahan aag lagati hui nazm

gaDiyan dauD paDin sabz hua jun signal

rah gai pichhe kahin aankh milati hui nazm

shairo koi sawalat uThata hua she'r

shairo koi sar-e-dar bulati hui nazm

KHud se Darta hua sahma hua rota hua main

chup karaati hui sine se lagati hui nazm