hath pakaD kar KHush-fahmi mein Dal diya hum jaison ko

haath pakaḌ kar ḳhush-fahmī meñ Daal diyā ham jaisoñ ko

jaise koī bīnā.ī ke ḳhvāb dikhā.e andhoñ ko

ab maiñ samjhā apnī qurbat meñ ye ḳhalish kyoñ aa.ī hai

paanī ziyāda dene se nuqsān huā hai paudhoñ ko

dil kā bojh bhī halkā huā aur rusvā.ī kā ḳhatra nahīñ

maiñ ne haal sunāyā jā kar jangal meñ kuchh peḌoñ ko

koī to hal DhūñDe āḳhir is be-rahm udāsī kā

varna ye barbād na kar de aane vaalī nasloñ ko

saare taare merī gavāhī dene ko aa jā.eñge

ik mah-vash kī ḳhātir kitnā jaagā huuñ maiñ rātoñ ko

tum bhī āḳhir us kī bātoñ meñ 'shīrāz' chale aa.e

aise pāgal roz banātā hai vo jaane kitnoñ ko

hath pakaD kar KHush-fahmi mein Dal diya hum jaison ko

jaise koi binai ke KHwab dikhae andhon ko

ab main samjha apni qurbat mein ye KHalish kyon aai hai

pani ziyaada dene se nuqsan hua hai paudhon ko

dil ka bojh bhi halka hua aur ruswai ka KHatra nahin

main ne haal sunaya ja kar jangal mein kuchh peDon ko

koi to hal DhunDe aaKHir is be-rahm udasi ka

warna ye barbaad na kar de aane wali naslon ko

sare tare meri gawahi dene ko aa jaenge

ek mah-wash ki KHatir kitna jaga hun main raaton ko

tum bhi aaKHir us ki baaton mein 'shiraaz' chale aae

aise pagal roz banata hai wo jaane kitnon ko