hath se hath mila dil se tabiat na mili

haath se haath milā dil se tabī.at na milī

aap ke saath mirī ek bhī aadat na milī

zindagī vaqf usī ke liye kar dī nādāñ

ek lamha jise tere liye fursat na milī

aish-o-ārām se kyuuñ kar hameñ miltī taskīn

jab hameñ ġham se ḳhushī rañj se rāhat na milī

us ko insān to kahte hue sharm aatī hai

terī dargah se jise rattī bhī ġhairat na milī

juuñ hī maidān meñ ham taan ke siina nikle

koī aafat koī dukh koī musībat na milī

lutf aatā hai hameñ zulm se Takkar le kar

hashr barpā na huā haa.e qayāmat na milī

kaun ghāTe meñ rahā faisla duniyā degī

jis ko daulat na milī yā jise izzat na milī

laakh bahutoñ kī lagī kuchh kī lagī das das laakh

'shād' ko puurī kisī sher kī qīmat na milī

hath se hath mila dil se tabiat na mili

aap ke sath meri ek bhi aadat na mili

zindagi waqf usi ke liye kar di nadan

ek lamha jise tere liye fursat na mili

aish-o-aram se kyun kar hamein milti taskin

jab hamein gham se KHushi ranj se rahat na mili

us ko insan to kahte hue sharm aati hai

teri dargah se jise ratti bhi ghairat na mili

jun hi maidan mein hum tan ke sina nikle

koi aafat koi dukh koi musibat na mili

lutf aata hai hamein zulm se Takkar le kar

hashr barpa na hua hae qayamat na mili

kaun ghaTe mein raha faisla duniya degi

jis ko daulat na mili ya jise izzat na mili

lakh bahuton ki lagi kuchh ki lagi das das lakh

'shad' ko puri kisi sher ki qimat na mili