habs jab had se baDha jism ke virane mein

habs jab had se baḌhā jism ke vīrāne meñ

ruuh ne bain kiyā dil ke azā-ḳhāne meñ

haa.e vo rang jo ubhrā mirī be-dhyānī se

haa.e vo naqsh jo bantā gayā an-jāne meñ

ab koī harf-o-ma.ānī kī ḳhabar kyā laa.e

ab kahānī hī kahāñ hai mire afsāne meñ

koī gutthī na khulī ek bhī 'uqda na khulā

mas.ala aur ulajhtā gayā suljhāne meñ

kaisī ḳhud-rav thī tirī yaad jo aatī hī rahī

dar-o-dīvār dhaḌakne lage kāshāne meñ

tāq-e-ummīd se paimāna-e-fardā ḳhālī

tishnagī baTne lagī hai tire mai-ḳhāne meñ

fasl-e-gul meñ bhī tirā chaak garebāñ na huā

koī āshufta-mizājī nahīñ dīvāne meñ

habs jab had se baDha jism ke virane mein

ruh ne bain kiya dil ke aza-KHane mein

hae wo rang jo ubhra meri be-dhyani se

hae wo naqsh jo banta gaya an-jaane mein

ab koi harf-o-maani ki KHabar kya lae

ab kahani hi kahan hai mere afsane mein

koi gutthi na khuli ek bhi 'uqda na khula

masala aur ulajhta gaya suljhane mein

kaisi KHud-raw thi teri yaad jo aati hi rahi

dar-o-diwar dhaDakne lage kashane mein

taq-e-ummid se paimana-e-farda KHali

tishnagi baTne lagi hai tere mai-KHane mein

fasl-e-gul mein bhi tera chaak gareban na hua

koi aashufta-mizaji nahin diwane mein