had-e-junun se bhi aage gae hain diwane

had-e-junūñ se bhī aage ga.e haiñ dīvāne

milegī manzil-e-maqsūd kab ḳhudā jaane

kiye haiñ tū ne munavvar diloñ ke kāshāne

tire vajūd se ābād haiñ sanam-ḳhāne

jo tum na the to bahāreñ ḳhizāñ se bad-tar thiiñ

tum aa ga.e to chaman ban ga.e ye vīrāne

shab-e-firāq hujūm-e-ġham-o-alam ke tufail

tumhārī yaad chalī aa.ī dil ko bahlāne

tamām umr rahī yuuñ hī chāk-dāmānī

chale haiñ ahl-e-ḳhirad aaj mujh ko samjhāne

'habāb' ashk-e-nadāmat haiñ un kī āñkhoñ meñ

qubūl kiije ḳhulūs-o-vafā ke nazrāne

had-e-junun se bhi aage gae hain diwane

milegi manzil-e-maqsud kab KHuda jaane

kiye hain tu ne munawwar dilon ke kashane

tere wajud se aabaad hain sanam-KHane

jo tum na the to bahaaren KHizan se bad-tar thin

tum aa gae to chaman ban gae ye virane

shab-e-firaq hujum-e-gham-o-alam ke tufail

tumhaari yaad chali aai dil ko bahlane

tamam umr rahi yun hi chaak-damani

chale hain ahl-e-KHirad aaj mujh ko samjhane

'habab' ashk-e-nadamat hain un ki aankhon mein

qubul kije KHulus-o-wafa ke nazrane