had se baDha jo zom mah-o-aftab mein

had se baḌhā jo zo'm mah-o-āftāb meñ

sūrat tirī banā.ī ḳhudā ne javāb meñ

nāzāñ na ho tū apne sitāroñ pe ai falak

haiñ dafn āftāb hazāroñ turāb meñ

hai kaun se gunāh kī ai shaiḳh ye sazā

kaaTī hai 'umr tū ne jo fikr-e-azāb meñ

āñkhoñ se ab pilā ke uḌā hosh sāqiyā

Daalā thā kis se pūchh ke paanī sharāb meñ

paḌhtā huuñ maiñ namāz sadā dil meñ jhāñk kar

saarī haiñ sūrateñ mire dil kī kitāb meñ

jannat meñ mai-gusār jahannum meñ shaiḳh jī

ġhalatī kahīñ huī hai farishto hisāb meñ

piirī meñ rog 'ishq kā mat paal ai 'sadā'

karnā thā dost kaam ye 'ahd-e-shabāb meñ

had se baDha jo zo'm mah-o-aftab mein

surat teri banai KHuda ne jawab mein

nazan na ho tu apne sitaron pe ai falak

hain dafn aaftab hazaron turab mein

hai kaun se gunah ki ai shaiKH ye saza

kaTi hai 'umr tu ne jo fikr-e-azab mein

aankhon se ab pila ke uDa hosh saqiya

Dala tha kis se puchh ke pani sharab mein

paDhta hun main namaz sada dil mein jhank kar

sari hain suraten mere dil ki kitab mein

jannat mein mai-gusar jahannum mein shaiKH ji

ghalati kahin hui hai farishto hisab mein

piri mein rog 'ishq ka mat pal ai 'sada'

karna tha dost kaam ye 'ahd-e-shabab mein