had se guzar na jaun main aisa na kijiye

had se guzar na jā.ūñ maiñ aisā na kījiye

mastī-bharī nigāh se dekhā na kījiye

palkoñ ko rāstoñ meñ bichhāyā na kījiye

yuuñ apne intizār ko rusvā na kījiye

paḌh leñge log chehre se dil kī kitāb ko

itnā kisī ke baare meñ sochā na kījiye

ġhairoñ pe e'tibār to hai baat duur kī

apnā bhī ho sake to bharosa na kījiye

merī nazar se aap kahāñ bach ke jā.eñge

maiñ aa.ina huuñ aap kā parda na kījiye

yuuñ mujh ko e'tibār bahut hai magar huzūr

va.ade to TuuT jaate haiñ va.ada na kījiye

rishta mirā zamīn se mazbūt hai bahut

ab mujh ko āsmāñ se pukārā na kījiye

ḳhud ko jahāñ se aadmī chhoTā dikhā.ī de

itnā bhī apne-āp ko ūñchā na kījiye

had se guzar na jaun main aisa na kijiye

masti-bhari nigah se dekha na kijiye

palkon ko raston mein bichhaya na kijiye

yun apne intizar ko ruswa na kijiye

paDh lenge log chehre se dil ki kitab ko

itna kisi ke bare mein socha na kijiye

ghairon pe e'tibar to hai baat dur ki

apna bhi ho sake to bharosa na kijiye

meri nazar se aap kahan bach ke jaenge

main aaina hun aap ka parda na kijiye

yun mujh ko e'tibar bahut hai magar huzur

wade to TuT jate hain wada na kijiye

rishta mera zamin se mazbut hai bahut

ab mujh ko aasman se pukara na kijiye

KHud ko jahan se aadmi chhoTa dikhai de

itna bhi apne-ap ko uncha na kijiye