hadd-e-junun ke par bhi jati rahi hun main

hadd-e-junūñ ke paar bhī jaatī rahī huuñ maiñ

dāman se apne aag bujhātī rahī huuñ meñ

sab dekhte rahe haiñ tamāshā khaḌe khaḌe

hañs kar badan kī ḳhaak uḌātī rahī huuñ maiñ

zanjīroñ meñ mirī koī jhankār to nahīñ

ashkoñ se apne shor machātī rahī huuñ maiñ

rakkhā hai sab ne qaid qafas meñ mujhe magar

zindāñ meñ āftāb ko laatī rahī huuñ maiñ

khīñchī thī āsmāñ pe nigah se lakīr ik

aahoñ se zarb ruuh miTātī rahī huuñ maiñ

vahshat meñ rū-ba-rū jo farishte hue 'shaġhaf'

harf-e-duā bhī un ko paḌhātī rahī huuñ maiñ

hadd-e-junun ke par bhi jati rahi hun main

daman se apne aag bujhati rahi hun mein

sab dekhte rahe hain tamasha khaDe khaDe

hans kar badan ki KHak uDati rahi hun main

zanjiron mein meri koi jhankar to nahin

ashkon se apne shor machati rahi hun main

rakkha hai sab ne qaid qafas mein mujhe magar

zindan mein aaftab ko lati rahi hun main

khinchi thi aasman pe nigah se lakir ek

aahon se zarb ruh miTati rahi hun main

wahshat mein ru-ba-ru jo farishte hue 'shaghaf'

harf-e-dua bhi un ko paDhati rahi hun main