hadd-e-nazar tak virane hain aabaadi ka nam nahin

hadd-e-nazar tak vīrāne haiñ ābādī kā naam nahīñ

kis raste pe qadam baḌhā.ūñ koī rasta aam nahīñ

jaltā registān hai har-sū tund havā.eñ chaltī haiñ

dhū dhū kartī hai do-pahrī sub.h nahīñ hai shaam nahīñ

saarī umr guzārī maiñ ne ḳhuun ke aañsū pī pī kar

ḳhushiyoñ ke do ghūñT pilā de aisā koī jaam nahīñ

tanhā huuñ maiñ is duniyā meñ koī nahīñ hai mere saath

kis ko ab āvāz lagā.ūñ kuchh bhī to anjām nahīñ

dar dar jā kar dastak dī hai par ik dar bhī vā na huā

har-sū ḳhāmoshī hai 'bismil' kahīñ se kuchh paiġhām nahīñ

hadd-e-nazar tak virane hain aabaadi ka nam nahin

kis raste pe qadam baDhaun koi rasta aam nahin

jalta registan hai har-su tund hawaen chalti hain

dhu dhu karti hai do-pahri subh nahin hai sham nahin

sari umr guzari main ne KHun ke aansu pi pi kar

KHushiyon ke do ghunT pila de aisa koi jam nahin

tanha hun main is duniya mein koi nahin hai mere sath

kis ko ab aawaz lagaun kuchh bhi to anjam nahin

dar dar ja kar dastak di hai par ek dar bhi wa na hua

har-su KHamoshi hai 'bismil' kahin se kuchh paigham nahin