haden phailin nazar ki phir bhi kam-bini nahin jati

hadeñ phailīñ nazar kī phir bhī kam-bīnī nahīñ jaatī

ki har sūrat abhī ek aañkh se dekhī nahīñ jaatī

zamīn-e-dil bahut kuchh narm kar dī be-qarārī ne

magar ham haiñ isī ehsās kī saḳhtī nahīñ jaatī

hayāt-e-jāma-zeb aur nau-ba-nau jaame magar kyā hai

ki is barbād-sāmāñ kī tunuk-raḳhtī nahīñ jaatī

tajallī be-naqāb aur kor āñkheñ kyā qayāmat hai

ki sūraj sāmne hai aur siyah-baḳhtī nahīñ jaatī

mirā zikr-e-vafā likh kar mo.arriḳh ye bhī likhtā hai

ye ik rasm-e-kuhan thī ab kahīñ bartī nahīñ jaatī

maiñ kyā muñh le ke aa.uuñ aap ke ā.īna-ḳhāne meñ

ye sūrat aisī bigḌī hai ki pahchānī nahīñ jaatī

tasavvur se bhī aage justujū kī raah jaatī hai

vahāñ kī baat lekin phir yahāñ laa.ī nahīñ jaatī

takalluf-bar-taraf rasm-e-muravvat tah karo 'rizvī'

mohabbat aap hotī hai mohabbat kī nahīñ jaatī

haden phailin nazar ki phir bhi kam-bini nahin jati

ki har surat abhi ek aankh se dekhi nahin jati

zamin-e-dil bahut kuchh narm kar di be-qarari ne

magar hum hain isi ehsas ki saKHti nahin jati

hayat-e-jama-zeb aur nau-ba-nau jame magar kya hai

ki is barbaad-saman ki tunuk-raKHti nahin jati

tajalli be-naqab aur kor aankhen kya qayamat hai

ki suraj samne hai aur siyah-baKHti nahin jati

mera zikr-e-wafa likh kar moarriKH ye bhi likhta hai

ye ek rasm-e-kuhan thi ab kahin barti nahin jati

main kya munh le ke aaun aap ke aaina-KHane mein

ye surat aisi bigDi hai ki pahchani nahin jati

tasawwur se bhi aage justuju ki rah jati hai

wahan ki baat lekin phir yahan lai nahin jati

takalluf-bar-taraf rasm-e-murawwat tah karo 'rizwi'

mohabbat aap hoti hai mohabbat ki nahin jati