hadis-e-ishq-o-mohabbat ka raazdan hun main

hadīs-e-ishq-o-mohabbat kā rāzdāñ huuñ maiñ

jo māvarā-e-takallum hai vo bayāñ huuñ maiñ

ba-qaid-e-hosh na vābasta-e-fuġhāñ huuñ maiñ

ye kyā maqām hai ai dil batā kahāñ huuñ maiñ

bhaTak gayā huuñ ki nazdīk-e-āstāñ huuñ maiñ

ḳhayāl-e-dost Thahar dekh luuñ kahāñ huuñ maiñ

asīr-e-vahm huuñ pā-basta-e-gumāñ huuñ maiñ

yaqīñ ki had se abhī duur huuñ jahāñ huuñ maiñ

bhulā diyā jise duniyā ne vo fasāna huuñ

sune na jis ko zamāna vo dāstāñ huuñ maiñ

tirī nigāh meñ vo kyā hai kyā nahīñ ma.alūm

vo lafz jis kā ba-īñ-hāl tarjumāñ huuñ maiñ

nigāh-e-barq meñ din raat yuuñ khaTaktā huuñ

chaman meñ jaise koī shāḳh-e-āshiyāñ huuñ maiñ

jise na mil sakā unvāñ vo ik fasāna huuñ

jo nā-tamām hai 'zamzam' vo dāstāñ huuñ maiñ

hadis-e-ishq-o-mohabbat ka raazdan hun main

jo mawara-e-takallum hai wo bayan hun main

ba-qaid-e-hosh na wabasta-e-fughan hun main

ye kya maqam hai ai dil bata kahan hun main

bhaTak gaya hun ki nazdik-e-astan hun main

KHayal-e-dost Thahar dekh lun kahan hun main

asir-e-wahm hun pa-basta-e-guman hun main

yaqin ki had se abhi dur hun jahan hun main

bhula diya jise duniya ne wo fasana hun

sune na jis ko zamana wo dastan hun main

teri nigah mein wo kya hai kya nahin malum

wo lafz jis ka ba-in-haal tarjuman hun main

nigah-e-barq mein din raat yun khaTakta hun

chaman mein jaise koi shaKH-e-ashiyan hun main

jise na mil saka unwan wo ek fasana hun

jo na-tamam hai 'zamzam' wo dastan hun main