hadon se baDh ke mukammal hudud saunpta hun

hadoñ se baḌh ke mukammal hudūd sauñptā huuñ

tirī thakan ko maiñ apnā vajūd sauñptā huuñ

ragoñ meñ ḳhuun kī hiddat se ḳhushk-sālī hai

maiñ us ravānī ko rasm-e-jumūd sauñptā huuñ

vo mujh se duur to maiñ us se duur hone lagā

maiñ barguzīda aziyyat ko suud sauñptā huuñ

maiñ sauñp dene kī manzil talak nahīñ pahuñchā

magar kisī ko qayām-o-sujūd sauñptā huuñ

vo be-zabān ḳhudā kar rahā thā sargoshī

maiñ ma.arifat ke tanāsub se juud sauñptā huuñ

to kyā ye lafz bhī ḳhālī haiñ ma.anaviyyat se

zabūr-e-jism ko rūh-e-da.ūd sauñptā huuñ

mirā vajūd madīna shumār hotā hai

maiñ jab bhī dil se dahan ko darūd sauñptā huuñ

nabī kā beTā huuñ nisbat hai mo'atabar merī

kisī ko faqr kisī ko numūd sauñptā huuñ

ayaañ bhī honā hai lekin nihāñ bhī rahnā hai

so ġhā.ebāna adā ko varūd sauñptā huuñ

mujhe hai ḳhauf-e-zamāna na nīche dab jaa.e

maiñ apne sar kā falak ko umuud sauñptā huuñ

tū merī aañkh ke hujre meñ lauT aa.egā

maiñ tujh ko donoñ-jahāñ kī hudūd sauñptā huuñ

tū dekhne kā irāda to bāñdh ai 'kāzim'

maiñ terī aañkh ko ramz-e-shuhūd sauñptā huuñ

hadon se baDh ke mukammal hudud saunpta hun

teri thakan ko main apna wajud saunpta hun

ragon mein KHun ki hiddat se KHushk-sali hai

main us rawani ko rasm-e-jumud saunpta hun

wo mujh se dur to main us se dur hone laga

main barguzida aziyyat ko sud saunpta hun

main saunp dene ki manzil talak nahin pahuncha

magar kisi ko qayam-o-sujud saunpta hun

wo be-zaban KHuda kar raha tha sargoshi

main marifat ke tanasub se jud saunpta hun

to kya ye lafz bhi KHali hain manawiyyat se

zabur-e-jism ko ruh-e-daud saunpta hun

mera wajud madina shumar hota hai

main jab bhi dil se dahan ko darud saunpta hun

nabi ka beTa hun nisbat hai mo'atabar meri

kisi ko faqr kisi ko numud saunpta hun

ayan bhi hona hai lekin nihan bhi rahna hai

so ghaebana ada ko warud saunpta hun

mujhe hai KHauf-e-zamana na niche dab jae

main apne sar ka falak ko umud saunpta hun

tu meri aankh ke hujre mein lauT aaega

main tujh ko donon-jahan ki hudud saunpta hun

tu dekhne ka irada to bandh ai 'kazim'

main teri aankh ko ramz-e-shuhud saunpta hun