hai ab ki fasl mein rang bahaar aur hi kuchh

hai ab kī fasl meñ rañg bahār aur hī kuchh

huā hai naqsha-e-shahr-o-dayār aur hī kuchh

na shahsavār na ġhaznī na kārvāñ koī

ufuq ke paar uThā thā ġhubār aur hī kuchh

shagūfe aaj bhī khulte haiñ kal bhī khulte the

hai is chaman kī ḳhizāñ aur bahār aur hī kuchh

hamāre vāste hamdam qarār-e-dil mat DhūñDh

ki pā gayā hai diloñ meñ qarār aur hī kuchh

na shāḳh kā na samar kā na āshiyāñ kā malāl

ki maiñ ne tujh pe kiyā thā nisār aur hī kuchh

sunā hai tañgī-e-kunj-e-lahad kā bhī ahvāl

hai aaj arz-o-samā kā fishār aur hī kuchh

navā-e-dil meñ vo āhañg dil-kushā na rahā

suḳhan ne rañg kiyā iḳhtiyār aur hī kuchh

hai ab ki fasl mein rang bahaar aur hi kuchh

hua hai naqsha-e-shahr-o-dayar aur hi kuchh

na shahsawar na ghazni na karwan koi

ufuq ke par uTha tha ghubar aur hi kuchh

shagufe aaj bhi khulte hain kal bhi khulte the

hai is chaman ki KHizan aur bahaar aur hi kuchh

hamare waste hamdam qarar-e-dil mat DhunDh

ki pa gaya hai dilon mein qarar aur hi kuchh

na shaKH ka na samar ka na aashiyan ka malal

ki main ne tujh pe kiya tha nisar aur hi kuchh

suna hai tangi-e-kunj-e-lahad ka bhi ahwal

hai aaj arz-o-sama ka fishaar aur hi kuchh

nawa-e-dil mein wo aahang dil-kusha na raha

suKHan ne rang kiya iKHtiyar aur hi kuchh